ਸਰਬੱਤ ਦੇ ਭਲੇ ਲਈ
ਇੱਕ ਪੰਥ ਇੱਕ ਸੋਚ
ਮਨੁੱਖਤਾ ਦੇ ਇਤਿਹਾਸ ਵਿੱਚ ਐਸਾ ਇਹ ਪਹਿਲੀ ਵਾਰ ਹੈ ਜਦੋਂ ਹਾਜ਼ਿਰਾ ਹਜ਼ੂਰ, ਜ਼ਾਹਿਰਾ ਜ਼ਹੂਰ, ਮਨੁਖੱਤਾ ਦੇ ਸਰਬ ਸਾਂਝੇ ਗੁਰੂ/ ਪੀਰ/ ਪੈਗੰਬਰ (ਧੰਨ ਧੰਨ ਸਾਹਿਬ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਮਹਾਰਾਜ ਦੇ ਰੂਪ ਵਿੱਚ) ਆਪਣੇ ਪੈਰੋਕਾਰਾਂ (ਸਿਖਾਂ) ਸਮੇਤ ਪੂਰੀ ਦੁਨੀਆਂ ਵਿੱਚ ਇੱਕੋ ਸਮੇਂ ਸਾਖ੍ਯਾਤ ਤੌਰ ਤੇ (physically) ਮੌਜ਼ੂਦ ਹਨ।
ਸਦੀਆਂ ਤੋਂ ਹਰ ਧਰਮ ਦੇ ਵਿਦਵਾਨ ਇਹ ਕਹਿ ਰਹੇ ਹਨ ਕਿ “ਇੱਕ ਦਿਨ ਸੰਸਾਰ ਦਾ ਭਲਾ ਸਾਹਿਬ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਰਹਿਨੁਮਾਈ ਵਿੱਚ ਹੀ ਹੋਣਾ ਹੈ”। ਸੰਸਾਰ ਦੇ ਬਦਲਦੇ ਹਾਲਾਤ ਵੀ ਇਸ ਸਮੇਂ ਦਾ ਹੀ ਇਸ਼ਾਰਾ ਕਰ ਰਹੇ ਹਨ ।
ਇਸੇ ਵਿਚਾਰ ਅਧੀਨ ਸੰਗਤ ਸੈਂਟਰਲ ਕੈਲੀਫੋਰਨੀਆ ਵਲੋਂ ਪਿਛਲੇ 8 ਵਰ੍ਹੇ ਤੋਂ ਜਾਰੀ ਮਿਸ਼ਨ “ਇੱਕ ਪੰਥ ਇੱਕ ਸੋਚ“(ਇਸਦੀ ਵਿਚਾਰ ਹੀ ਸਾਰੀ ਵੈਬਸਾਈਟ ਦਾ ਵਿਸ਼ਾ ਹੈ)।
ਇਸ ਮਿਸ਼ਨ ਨੂੰ ਹੁਣ ਸੰਗਤ ਸੈਂਟਰਲ ਕੈਲੀਫੋਰਨੀਆ ਦੀਆਂ ਸੰਗਤਾਂ ਪੂਰੇ ਸੰਸਾਰ ਦੀਆਂ ਸੰਗਤਾਂ ਨੂੰ ਸੌਂਪਦੇ ਹੋਏ ਬੇਨਤੀ ਕਰ ਰਹੀਆਂ ਹਨ ਕਿ ਸਾਹਿਬ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਸਾਡੇ ਸਭ ਦੇ ਰੱਬ – ਰਾਜਾ – ਮਹਾਰਾਜਾ ਸਭ ਕੁਝ ਹੀ ਹਨ… ਅਤੇ ਬਾਕੀ ਹਰ ਸਿੱਖ ਇਕ ਸਮਾਨ ਅਤੇ ਸੇਵਾਦਾਰ।
ਸਿੱਖੀ ਸਰਬੱਤ ਦੇ ਭਲੇ ਲਈ ਹੌਦ ਵਿੱਚ ਆਈ ਸੀ। ਗੁਰੂ ਸਾਹਿਬਾਨ, ਭਗਤ ਸਾਹਿਬਾਨ, ਭੱਟਾਂ ਅਤੇ ਗੁਰਸਿਖਾਂ ਦੇ 250 ਸਾਲ ਦੀ ਕਰੜੀ ਘਾਲ ਅਤੇ ਬੇਅੰਤ ਕੁਰਬਾਨੀਆਂ ਤੋ ਬਾਦ ਸੰਸਾਰ ਦੇ ਸਾਂਝੇ ਰਹਿਬਰ, ਜੁਗੋ ਜੁਗ ਅਟੱਲ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਗੱਦੀ ਤੇ ਬਿਰਾਜਮਾਨ ਹੋਏ। ਦਸਮ ਪਿਤਾ ਨੇ ਸ਼ੀਸ਼ ਨਿਵਾਇਆ, ਜ਼ਿਹਨਾਂ ਦਾ ਸ਼ੀਸ਼ ਕੇਵਲ ਪਰਮੇਸ਼ਰ ਅੱਗੇ ਹੀ ਝੁੱਕ ਸਕਦਾ ਸੀ। ਜਿਸਦਾ ਭਾਵ ਸੀ ਕਿ ਹੁਣ ਇਹ ਗੁਰੂ – ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ – ਹੀ ਹਰ ਸਿੱਖ ਦੇ ਰੱਬ ਰਾਜਾ ਮਹਾਰਾਜਾ ਸਭ ਕੁਝ ਹੀ ਹਨ, ਬਾਕੀ ਸਬ ਨਤਮਸਤਕ ਹੋਣ ਵਾਲੇ ਮਰਜੀਵੜੇ ਸਿੱਖ ਸੇਵਾਦਾਰ। ਇਸੇ ਵਿਚਾਰ ਤੇ ਆਧਾਰਿਤ ਸੈਟਰਲ ਕੈਲੀਫੋਰਨੀਆ ਦੀਆਂ ਸੰਗਤਾਂ ਨੇ 8 ਸਾਲ ਤੋਂ ਚਲਾਈ ਹੋਈ ਹੈ “ਇਕ ਪੰਥ ਇਕ ਸੋਚ” ਨਾਂ ਹੇਠ ਸਰਬੱਤ ਦੇ ਭਲੇ ਲਈ ਹਲੇਮੀ ਰਾਜ, ਬੇਗਮਪੁਰਾ ਲਈ ਸਿੱਖ ਏਕਤਾ ਲਹਿਰ। ਇਹ ਮੁਹਿੰਮ ਹੁਣ ਸੰਗਤ ਸੈਂਟਰਲ ਕੈਲੀਫੋਰਨੀਆ ਦੀਆਂ ਸੰਗਤਾਂ ਪੂਰੇ ਪੰਥ ਨੂੰ ਸੌਂਪ ਰਹੀਆਂ ਹਨ। ਜਿਸ ਅਨੁਸਾਰ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਸਾਡੇ ਸਭ ਕੁਛ ਬਾਕੀ ਸਭ ਸਿੱਖ ਮਰਜੀਵੜੇ ਸੇਵਾਦਾਰ।
ਇਸ ਦੇ ਨਾਲ ਅੱਜ ਦਾ ਇਹ ਸਮਾਂ ਹੋ ਚੁਕੀਆਂ ਬੇਅੰਤ ਕੁਰਬਾਨੀਆਂ ਦਾ ਕਰਜ ਹਲਕਾ ਕਰਨ ਦਾ ਸ਼ਾਇਦ ਸਾਡਾ ਆਖਰੀ ਮੌਕਾ ਹੋ ਸਕਦਾ ਹੈ।
ਇਹ ਕਾਰਜ ਸਾਡਾ ਆਤਮ ਨਿਰੀਖਣ ਅੱਤੇ ਸਾਡੀਆਂ ਵਿਚਾਰਾਂ – ਸਫਲਤਾਵਾਂ ਦਾ ਮੁਲਾਂਕਣ ਭੀ ਕਰੇਗਾ ਕਿ “ਕੀ ਇਹ ਸਫਲਤਾਵਾਂ ਸਾਡੇ ਨਿੱਜੀ ਸਵਾਰਥ ਲਈ ਹਨ ਜਾਂ ਸਰਬੱਤ ਦੇ ਭਲੇ ਲਈ ਗੁਰੂ ਪਰਮੇਸ਼ਰ ਦੀ ਬਖ਼ਸ਼ੀ ਦਾਤ।” ????..
“ਇਕ ਪੰਥ ਇਕ ਸੋਚ”
ਗੁਰੂ ਸਾਹਿਬ ਦੀ ਸੰਸਾਰ ਤੇ ਆਮਦ ਅਤੇ ਸਿੱਖੀ ਦਾ ਹੋਂਦ ਵਿੱਚ ਆਉਣ ਦਾ ਕਾਰਨ
ਗੁਰੂ ਸਾਹਿਬ ਦਾ ਸੰਸਾਰ ਤੇ ਆਉਣ ਦਾ ਕਾਰਨ ਸੀ ਸਰਬੱਤ ਦਾ ਭਲਾ। ਜਿਤਨੇ ਵੀ ਮਹਾਂਪੁਰਸ਼ ਪਰਮੇਸ਼ਰ ਨੇ ਮਨੁੱਖਤਾ ਦੀ ਅਗਵਾਈ ਲਈ ਭੇਜੇ, ਸਭ ਦਾ ਮਕਸਦ ਸਰਬੱਤ ਦਾ ਭਲਾ ਹੀ ਸੀ। ਵੱਡੇ ਕਾਰਜ ਲਈ ਘਾਲਣਾ ਵੀ ਉਤਨੀ ਹੀ ਵੱਡੀ ਕਰਨੀ ਪੈਣੀ ਹੈ। ਸੱਚ ਕੀ ਬਾਣੀ ਦੇ 35 ਮਹਾਂਪੁਰਸ਼ਾਂ (ਗੁਰੂ ਸਾਹਿਬਾਨ, ਭਗਤ ਸਾਹਿਬਾਨ, ਭੱਟਾਂ ਅਤੇ ਗੁਰਸਿਖਾਂ) ਦੀ ਘਾਲਣਾ, ਅਤੇ ਬੇਅੰਤ ਸਿੱਖਾਂ ਦੀਆਂ ਕੁਰਬਾਨੀਆਂ ਤੋਂ ਬਾਅਦ ਗੁਰਗੱਦੀ ਤੇ ਬਿਰਾਜਮਾਨ ਹੋਏ ਜੁੱਗੋ ਜੁਗ ਅਟਲ ਸੰਸਾਰ ਦੇ ਸਾਂਝੇ ਰਹਿਬਰ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ।
ਲਗਾਤਾਰ ਸੱਚ ਨੂੰ ਮਿਟਾਉਣ ਦੀਆਂ ਸ਼ਾਜਿਸਾਂ ਅਤੇ ਸੱਚ ਦੀ ਜਿੱਤ ਲਈ ਕੁਰਬਾਨੀਆਂ
ਗੁਰੂ ਸਾਹਿਬ ਤੋਂ ਪਹਿਲਾਂ ਭੀ ਸੰਸਾਰ ਵਿੱਚ ਚੱਲ ਰਹੇ ਸੱਚ ਨੂੰ ਮਿਟਾਉਣ ਦੇ ਰਵੱਈਏ ਦੀ ਤਰ੍ਹਾਂ ਹੀ, ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਇਸ ਸਿਧਾਂਤ ਨੂੰ ਮਿਟਾਉਣ ਲਈ ਮਨੁੱਖਤਾ ਨੂੰ ਵੰਡਣ ਵਾਲਿਆਂ ਦੀਆਂ ਕੋਸ਼ਿਸ਼ਾਂ ਜਾਰੀ ਰਹੀਆਂ ਅਤੇ ਅੱਜ ਭੀ ਹਨ। ਦੂਸਰੇ ਪਾਸੇ, ਗੁਰੂ ਸਾਹਿਬ ਵੱਲੋਂ ਭਰੇ ਜਨੂੰਨ ਅਨੁਸਾਰ ਸੱਚ ਤੇ ਪਹਿਰਾ ਦੇਣ ਵਾਲਿਆਂ ਦੀਆਂ ਕੁਰਬਾਨੀਆਂ ਭੀ ਵੱਡੀ ਗਿਣਤੀ ਵਿੱਚ ਜਾਰੀ ਰਹੀਆਂ। ਇਸ ਤਰਾਂ ਸਰਬੱਤ ਦੇ ਭਲੇ ਦਾ ਕਾਰਜ ਸੰਪੂਰਨ ਕਰਨ ਲਈ ਬੇਅੰਤ ਕੁਰਬਾਨੀਆਂ ਦਾ ਬਹੁਤ ਲੰਬਾ ਇਤਿਹਾਸ ਹੈ।
ਧਰਤ ਸੁਹਾਵੀ, ਸਰਬੱਤ ਦੇ ਭਲੇ ਲਈ ਸੈਂਟਰਲ ਕੈਲੀਫੋਰਨੀਆ — ਇੱਕ ਕੋਸ਼ਿਸ਼ “ਇਕ ਪੰਥ ਇਕ ਸੋਚ”
ਪਰਮੇਸ਼ਰ ਜੀ ਕਿਸੇ ਦੀ ਘਾਲਣਾ ਵਿਅਰਥ ਨਹੀਂ ਜਾਣ ਦਿੰਦੇ। ਸੈਂਟਰਲ ਵੈਲੀ ਕੈਲੀਫੋਰਨੀਆ ਦੀਆਂ ਸੰਗਤਾਂ ਦੀ ਤੀਹ ਵਰ੍ਹੇ ਤੋਂ ਸਿੱਖ ਕੌਂਸਲ ਰਾਹੀਂ ਸਰਬੱਤ ਦੇ ਭਲੇ ਲਈ ਸਿੱਖ ਏਕਤਾ ਦੀ ਕੋਸ਼ਿਸ਼ ਜਾਰੀ ਸੀ।
8 ਵਰ੍ਹੇ ਪਹਿਲਾਂ ਸਿੱਖ ਮਰਜੀਵੜਿਆਂ ਦੇ ਪ੍ਰਵੇਸ਼ ਨਾਲ “ਇੱਕ ਪੰਥ ਇੱਕ ਸੋਚ” ਦੀ ਆਵਾਜ਼ ਉੱਠੀ, ਜਿਸ ਨੇ ਕਿ 6 ਸਾਲ ਪਹਿਲਾਂ ਲਹਿਰ ਦਾ ਰੂਪ ਧਾਰਨਾ ਸ਼ੁਰੂ ਕਰ ਦਿੱਤਾ। 14 ਗੁਰੂ ਘਰਾਂ ਦੀਆਂ ਸੰਗਤਾਂ ਨੇ ਵੀਡੀਓਜ਼ ਰਾਹੀਂ ਸੰਸਾਰ ਦੀਆਂ ਸੰਗਤਾਂ ਨੂੰ ਸਿੱਖ ਏਕਤਾ ਲਈ ਬੇਨਤੀ ਕੀਤੀ।
ਕੋਰੋਨਾ ਕਾਲ ਵਿੱਚ ਸਾਰੀਆਂ ਸੰਸਥਾਵਾਂ ਵਲੋਂ “ਇੱਕ ਪੰਥ ਇੱਕ ਸੋਚ” ਦੀ ਗੱਲ ਕਰਨ ਵਾਲੇ ਮਰਜੀਵੜਾ ਸੇਵਾਦਾਰ ਨੂੰ ਕੋਆਰਡੀਨੇਸ਼ਨ ਦੀ ਆਗਿਆ ਦਿੱਤੀ। ਸੰਸਾਰ ਦੇ ਵੱਖ ਵੱਖ ਹਿੱਸਿਆਂ ਵਿੱਚੋਂ 50 ਤੋਂ ਵੱਧ ਸਿੱਖ ਵਿਦਵਾਨਾਂ ਨੂੰ ਰੇਡੀਓ ਅਤੇ ਟੀ ਵੀ ਟਾਕ ਸ਼ੋਅਜ ਰਾਹੀਂ ਵਿਚਾਰ ਕਰਨ ਲਈ ਬੇਨਤੀ ਕੀਤੀ ਗਈ, ਜਿਨ੍ਹਾਂ ਨੇ ਇਸ ਨੂੰ ਸਲਾਹੁਣਾ ਅਤੇ ਸਹਿਯੋਗ ਦੋਵੇਂ ਦਿੱਤੇ। ਵੇਰਵਾ ਤੁਸੀਂ Ek Panth Ek Soch Facebook page ਤੇ ਦੇਖ ਸਕਦੇ ਹੋ ਜੀ।
ਲੀਡਰੀ ਨਹੀਂ ਸੇਵਾਦਾਰੀ ਲਈ ਸੰਗਤਾਂ ਨੂੰ ਬੇਨਤੀ
ਕਿਉਂਕਿ ਸਰਬੱਤ ਦੇ ਭਲੇ ਲਈ ਸਿੱਖ ਏਕਤਾ ਦਾ ਇਹ ਕਾਰਜ ਮਰਜੀਵੜਿਆਂ ਅਤੇ ਸੰਗਤਾਂ ਵੱਲੋਂ ਸ਼ੁਰੂ ਹੋਇਆ ਹੈ ਕਿ ਗੁਰ ਪਰਮੇਸ਼ਰ ਜੀ ਹੀ ਖ਼ਾਸ ਹਨ। ਬਾਕੀ ਮਨੁੱਖਤਾ ਵਿੱਚ ਖ਼ਾਸ ਜਾਂ ਆਮ ਦਾ ਵਹਿਮ ਉਸ ਦਾ ਪੈਦਾ ਕੀਤਾ ਮਾਇਆ ਜਾਲ ਹੈ। ਹੁਣ ਆਪ ਨਿਡਰ ਹੋ ਕੇ ਫਾਰਮ ਭਰਨਾ ਅਤੇ ਹੋਰਾਂ ਕੋਲੋਂ ਭਰਵਾਉਣ ਦੀ ਮੁਹਿੰਮ ਤੇਜੀ ਨਾਲ ਚਲਾਉਣੀ ਹੈ, ਤਾਂ ਜੋ ਗੁਰੂ ਸਾਹਿਬ ਨੂੰ ਰੱਬ ਰਾਜਾ ਤੇ ਲੀਡਰ ਮੰਨਣ ਵਾਲੀਆਂ ਕਰੋੜਾਂ ਸੰਗਤਾਂ ਦੀ ਇਸ ਮੁਹਿੰਮ ਨਾਲ ਪੰਥ ਇਕ ਵਾਰ ਪੂਰਨ ਤੌਰ ਤੇ ਲੀਡਰੀ ਦੀ ਭੁੱਖ ਤੋਂ ਮੁਕਤ ਹੋ ਜਾਵੇ।
ਲੀਡਰੀ ਦੀ ਭੁੱਖ ਹੀ ਸਿੱਖੀ ਦੇ ਮੁੱਖ ਟੀਚੇ ਨੂੰ ਪ੍ਰਾਪਤ ਕਰਨ ਵਿਚ ਸਬ ਤੋਂ ਵੱਡੀ ਰੁਕਾਵਟ ਹੈ।
“ਸਿੱਖੀ ਵਿੱਚ ਸੰਗਤ ਦੀ ਮਹਾਨਤਾ”
ਸੰਗਤਾਂ ਨੂੰ ਸੰਗਤਾਂ ਵੱਲੋਂ ਬੇਨਤੀ
ਕਿਉਂਕਿ ਗੁਰੂ ਸਾਹਿਬ ਵੱਲੋਂ ਬਖ਼ਸ਼ੇ ਮਰਜੀਵੜਾ ਵਿਚਾਰ ਅਨੁਸਾਰ ਹਰ ਸਿੱਖ ਨੂੰ ਹੀ ਗੁਰੂ ਸਾਹਿਬ ਨੇ ਸੇਵਾਦਾਰ ਬਣਾਇਆ ਹੈ, ਲੀਡਰ ਨਹੀਂ। ਇਸ ਲਈ ਇਸ ਲੇਖ ਨੂੰ ਪੜ੍ਹ ਅਤੇ ਵਿਚਾਰ ਕਰਕੇ ਹਰ ਸਿੱਖ ਨੇ ਇਹ ਜ਼ਿੰਮੇਵਾਰੀ ਪੂਰੀ ਕਰਦੇ ਹੋਏ ਧਰਤ ਸੁਹਾਵੀ ਲਈ Form No.1 ਅਤੇ Happy Earth Parliament ਲਈ ਸੇਵਾਦਾਰ ਮਰਜੀਵੜਾ Form No.2 ਭਰਨਾ ਹੈ। ਹਰ ਸਿੱਖ ਨੇ ਮਿਲਕੇ ਸਰਬੱਤ ਦੇ ਭਲੇ ਦਾ ਇਕ ਐਸਾ ਸਿਸਟਮ ਤਿਆਰ ਕਰਨਾ ਹੈ, ਜਿਸਦੇ ਅਧੀਨ ਰਹਿ ਕੇ ਕੋਈ ਭੀ ਦੇਹਧਾਰੀ ਮਨੁੱਖ ਪਰਮੇਸ਼ਰ ਦਾ, ਗੁਰੂ ਦਾ ਜਾਂ ਸ਼ਹੀਦਾਂ ਦਾ ਨਾਂ ਵਰਤ ਕੇ ਮਨਮਾਨੀ ਨਾ ਕਰ ਸਕੇ। “ਪੰਜਾਬ ਵਸਦਾ ਗੁਰਾਂ ਦੇ ਨਾਂ ਤੋਂ — ਇਹ ਧਰਤ ਸੁਹਾਵੀ ਦੀ ਸੁਰੂਆਤ ਸਿੱਖਾਂ ਅਤੇ ਸਾਰੇ ਪੰਜਾਬੀਆਂ ਨੇ ਮਿਲ ਕੇ ਕਰਨੀ ਹੈ।”
